Television, Search Engine aur AI: Parivartan ke Chakra ka Agla Padav
Kya kabhi kisi ne socha tha ki saas-bahu ke serial, 24 ghante chalne wale khabariya channels, dish antenna aur cable connection par tikka hua poora Television ecosystem, agle daur mein apni antim saansein ginne lagega?
Yahan Television ka matlab video content nahi hai. Video to aur zyada dekha ja raha hai. Badal raha hai uska madhyam — TV channel, cable operator, set-top box, dish connection aur fixed broadcast timing ka poora purana model.
Remote ab raah dekhta rehta hai — koi haath use apne haath mein le. Magar afsos, mobile wale haath remote nahi pakadte.
Aaj ki technic, kal ki baat hote der nahi lagti. Ise hi Bhartiya darshan mein parivartan ka siddhant kaha gaya hai. Masalan — gramophone ko radio ne replace kiya, jise tape recorder ne replace kiya. Two-in-one ko CD player ne replace kiya, aur CD player ko mobile kha gaya.
Aise hi technic aage badhti rehti hai. Kalyug mein evolution hi satya hai, baaki mithya.
Internet ki duniya ka betaaj baadshah — Google Search — jisne kareeb teen dashak tak digital information access par apna prabhav banaye rakha, aaj badalti hawa ko mehsoos kar raha hai. Naya daur search engine ko khatam karne ka nahi, balki uska roopantaran AI ke madhyam se karne ka hai. Jo log aaj baat-baat mein kehte hain “kuch dhoondhna hai to Google kar lo” — woh agle kuch samay mein kehne lagenge: “AI se pooch lo.”
Ho sakta hai meri ye baat abhi samajh na aaye, magar bhavishya mein ye baatein yaad aayengi.
Main koi Time Traveller nahi hoon. Main ek Astro Researcher hoon, aur apne observation aur analysis ke aadhar par kuch bhi kehta hoon.
Android mobile ek kranti tha — jisne watch, radio, torch, cyber cafe, camera, telephone jaise anek dhandhon par taale lagwa diye. Kuch aisi hi badi kranti hone ko hai. AI products bahut si paramparik industry ka swaroop ya to badal denge, ya zaroorat hi khatam kar denge.
Rahu Dev hamesha vakri (retrograde) chalte hain — isliye unki rashi-yatra ulti disha mein hoti hai. Unke chakra ki pehli rashi Meen hoti hai. Isi kaaran kisi bhi nayi takneeki lehar ka beejaropan Meen mein hota hai.
2022 ke ant mein ChatGPT ke launch ke baad AI aam charcha ka vishay bana, aur 2023 mein aam janmanas ne pehli baar AI ko sirf science fiction nahi, balki rozmarra ke tool ke roop mein mehsoos karna shuru kiya. Isi daur — 2023 ke ant mein — Rahu Meen mein aaye, aur AI ka beej aam janmanas ke mann mein pada. Isliye Meen ko is technology cycle ka beejaropan bindu maana ja sakta hai.
Rahu jab Kumbh mein aate hain, technology beej se nikal kar samajik prabhutva ki taraf badhne lagti hai. Yahi daur AI ko experiment se ecosystem banane ka daur hai. Rahu ka yeh Kumbh-prabhav November 2026 tak sakriya hai.
Waqt aata hai waqt par, nayi ‘ijaad’ liye,
Peechhe chhoot jaati hain purani ‘riwayatein’ kahin,
Sab kuch hota hai badalte daur mein bas,
Kambakht waqt ke paas waqt hi nahi hota.
“Har nayi cheez ka pehle mazak udaya jaata hai, phir virodh hota hai, phir use dabaya jaata hai — aur phir bhi woh aage badhti hai. Tab yehi log kehte hain: ‘Dekha, hum to pehle hi kehte the.’ AI ke saath aaj yahi ho raha hai. Governments aur Corporates jo AI ko apna competitor maan rahe hain — woh bhi kal yehi kahenge: ‘Humne sabse pehle AI adopt kiya tha.’ Kyunki AI future nahi — AI bijli hai. Aur bijli ko koi rok nahi sakta.”